Bëhuni gati për acar në Zvicër dhe Kosovë

Keystone

Ditët e ardhshme Kosova do të përfshihst me mot të ligë dhe ulje temperaturash, reshje shiu dhe dëbore, transmeton albinfo.ch.

Kjo situatë e parashikuar meteorologjike do të kushtëzojë mot kryesisht të vranët dhe me kushte për reshje shiu dhe bore, deri sa në viset e larta parashihet të bie vetëm borë.

Temperaturat do të shënojnë ulje për 8-10 gradë celsius, sidomos ato maksimalet derisa minimalet do të shënojnë rritje të lehta.

Temperaturat minimale parashihen të lëvizin ndërmjet 0-1 gradë celsius, ndërsa maksimalet e ditës parashihen të lëvizin ndërmjet 5-7 gradë celsius.

Do të fryjë erë nga drejtimi i juglindjes dhe verilindjes me shpejtësi 1-8 m/s.

Edhe Zvicra do të përfshihet nga moti i ftohtë, sipas parashikimit të Zyrës Federale të Meteorologjisë dhe Klimatologjisë (MeteoSuisse).

Nga e shtuna, më 6 mars, dëbora dhe kushtet e ftohta priten përgjatë shpatit verior të Alpeve dhe në fushat në disa rajone, përcjell albinfo.ch.

Temperaturat do të shkojnë deri në minus 4 gradë celsius, kurse në fundjavën e ardhshme mund të ketë edhe reshje bore.