Kosovë: 512 persona mbi 85 vjeç vaksinohen për tri ditë

Për tri ditë në sallën “1 Tetori” janë vaksinuar 512 persona mbi moshën 85-vjeçare.

Niman Bardhi, koordinator në Qendrën e Vaksinimit në sallën “1 Tetori”, ka treguar për EO se vetëm gjatë ditës së sotme janë vaksinuar 62 persona.

Bardhi ka shtuar se vaksinimi i kësaj kategorie është duke shkuar mirë dhe nuk është shoqëruar me asnjë komplikim.

“Deri më tani janë vaksinuar 512 persona, ndërsa deri në këto momente janë 62 të vaksinuar dhe presim edhe të tjerë, situata është e qetë dhe shpresojmë se do të vazhdojë kështu edhe ditët në vijim”, u shpreh ai për EO.

Procesi i vaksinimit në Kosovë ka filluar vetëm në fillim të këtij muaji. Kështu, Kosova mbetet vendi i fundit në Evropë në këtë drejtim.