Kosova

Qeveria Kurti, kundër mini-Shëngenit ballkanik

Për qeverinë e Republikës së Kosovës nuk është riaktualizuar mini–shengeni, për shkak se nuk ka qenë aktual asnjëherë

E diel, 6 Qershor 2021 - 15:40 albinfo.ch

Qeveria Kurti vazhdon të kundërshtojë mini-Shengenin ballkanik. Ekzekutivi në Kosovë thotë se është pro bashkëpunimit rajonal, por vetëm mbi bazën e barazisë dhe moszëvendësimit të projektit të BE-së.

Zëdhënësi i Qeverisë së Kosovës, Përparim Kryeziu, duke kundërshtuar këtë nismë, thotë për KosovaPress se çështja e mini-shengenit ballkanik nuk ka qenë asnjëherë temë në ekzekutiv.

“Për Qeverinë e Republikës së Kosovës nuk është riaktualizuar mini–shengeni, për shkak se nuk ka qenë aktual asnjëherë. Ju e dini qëndrimin e qeverisë sa i përket projektit të mini–Shengenit, i cili meqenëse vendlindjen e ka në Novi Sad më saktë është t’i themi ideja e zonës së Novi-Sadit. Ne si qeveri dhe si shtet jemi të hapur për bashkëpunim rajonal, mirëpo vetëm mbi bazën e barazisë dhe reciprocitetit. Po ashtu jemi të hapur për bashkëpunim rajonal në atë mënyrë që ai nuk e zëvendëson projektit e BE-së dhe integrimit tonë në të, por veçse e fuqizon dhe avancon përpjekjen e shtetit tonë pro Ballkanit për anëtarësim në BE”, tha Kryeziu.

Ai arsyeton edhe miratimin e dy nismave nga Qeveria Kurti, për nënshkrimin e marrëveshjeve ndërkombëtare që do të lehtësojnë lëvizjen e qytetarëve brenda rajonit të Ballkanit Perëndimor.

“Kjo çfarë po bëjmë ne është në kuadër të procesit të Berlinit, i cili si proces ka lindur në Berlin, mbështetet nga zyra e kancelares Merkel dhe ka për synim dhe qëllim mbështetjen e Ballkanit Perëndimor për integrim në BE. Gatishmëria jonë për të qenë të hapur për bashkëpunimin rajonal është e tillë që t’i shërbejë Kosovës në integrim të BE-së dhe jo të zëvendësojë me ide të që kanë lindur në Novi Sad”, shtoi ai.

Ndërkohë, njohësit e marrëdhënieve ndërkombëtare thonë se mini-shengeni nuk është çështje prioritare për vendin.

“Sa i përket çështjes së mini-shengenit unë nuk mendoj që është çështje e vdekur, megjithatë nuk është çështje prioritare, as për qeverinë as për qytetarin e Kosovës. Çështjet e bashkëpunimit rajonal janë jashtëzakonisht të rëndësishme, prandaj unë pres që qeveria t’i shqyrtojë të gjitha nismat për themelimin e bashkëpunimit rajonal. Megjithatë, sa i përket çështjes konkrete nuk është që pres nga qeveria ndonjë hap tani për tani”, deklaroi Kryeziu.

Ndërkaq Maqedonia e Veriut kërkon mbështetje për mini-shengenin, që sheh si një nismë në interes të rajonit.

“Çdo iniciativë, e cila do të rritë mundësitë për qytetarët tonë të Ballkanit Perëndimor mendoj se duhet të përkrahet. Duhet të shohim se cili është benifiti ekonomik dhe mendoj se zanafilla e bashkëpunimit rajonal ngërthen në vete mundësi dhe benefite ekonomike. Prandaj, të gjitha shtetet e Ballkanit Perëndimor i shoh të njëjtë, të barabartë, sepse vetëm ashtu mund të ecim përpara në sfidat që na presin”, tha Përparim Kryeziu përcjell Albinfo.ch.

Ideja e mini-shengenit ballkanik është prezantuar në fund të vitit 2019, dhe në fillim i gjithë spektri politik në Kosovë u shpreh kundër saj. Ndërsa, në marrëveshjen e Uashingtonit, ish-kryeministri Hoti në njërën ndër pikat ishte zotuar për mbështetje karshi mini-shengenit.