Kurti i kërkon Serbisë të distancohet nga krimet e Millosheviqit

Sipas Kurtit, Serbia nuk ka zgjidhje tjetër përveç njohjes së Kosovës

Kryeminstri i Kosovës, Albin Kurti, në Samitin e liderëve të Ballkanit Perëndimor i ka kërkuar Serbisë të distancohet nga krimet e kryera nga regjimi i Millosheviqit.

“Serbia duhet të shkëputet duke u distancuar nga regjimi i Millosheviqit, duke qenë se nuk ka zgjedhje tjetër, veçse ta njohë pavarësinë e Kosovës. Pavarësia e Kosovës nuk është e mirë vetëm për Kosovën por edhe për Serbinë, se po mban edhe veten peng. Para 13 vjetëve Kosova e ka shpallur pavarësinë nga Serbia”, transmeton Albinfo.ch.

Derisa duke folur për bashkëpunimin e vendeve të Ballkanit, Kurti tha se dha një propozim.

“Nismat e ndryshme i bëjnë bashkë liderët e Ballkanit për të sjellë frymën e integrimeve evropiane. Nismat rajonale po ngecin për shkak se mungon njohja e Kosovës nga Serbia. Njohja do bënte që vendet të bashkëpunonin më shumë. Nuk mjafton vetëm tregu i përbashkët por që vlerat e BE-së të vendosen në raportet mes shteteve. Në fund dhashë një propozim si mund të ecim para. Kjo është marrëveshje e tregut. Për të organizuar samite të përbashkëta çdo tre vjet dhe në fund të kësaj dekade të ishim të gatshëm për integrim në BE. Ajo që është më e rëndësishme është së Serbia të njohë pavarësinë e Kosovës për të pranuar aktualitetin real”, ka thënë Kurti

---