6 deputetë të Parlamentit të Serbisë e njohin pavarësinë e Kosovës

Në njoftimin e Qeverisë thuhet se “gjashtë deputetë të Kuvendit të Serbisë e njohin pavarësinë e Kosovës dhe e përkrahin Qeverinë Kurti”

Gjashtë deputetë të Kuvendit të Serbisë, shqiptarë e boshnjakë, kanë vizituar të mërkurën Qeverinë e Kosovës dhe kryeministrin Albin Kurti.

Në njoftimin e Qeverisë thuhet se “gjashtë deputetë të Kuvendit të Serbisë e njohin pavarësinë e Kosovës dhe e përkrahin Qeverinë Kurti”.

Më tutje bëhet e ditur se në vizitë te Kurti kanë qenë Sylejman Ugljanin, kryetar i Partisë Aksioni Demokratik i Sanxhakut, Shaip Kamberi, shef i Grupit parlamentar “Lugina e Bashkuar – SDA Sanxhak”, deputetët Enis Imamoviq, Nadije Beqiri, Mirsad Hodzhiq, Argjend Bajrami dhe Selma Kuçeviq.

“Ia shprehën gjithë përkrahjen e tyre Kryeministrit të Republikës së Kosovës, Albin Kurti në takimin që patën sot në zyrën e tij në Qeverinë e Republikës së Kosovës”, thuhet në njoftimin e Qeverisë.

Kryetari i Partisë minoritare boshnjake Aksioni Demokratik i Sanxhakut, Sulejman Ugljani, ka theksuar se deputetët e koalicionit “Lugina e Bashkuar – SDA Sanxhak” e njohin pavarësinë dhe shtetin e Kosovës.

Ai ka falënderuar Kryeministrin Kurtin për miratimin e rezolutës për Sebrenicën në Kuvendin e Kosovës, duke potencuar se Kurti me këtë akt përveç që i mbron të drejtat e boshnjakëve, ai i mbron edhe drejtat e shqiptarëve.

Deputeti boshnjak ka komentuar edhe vendosjen e reciprocitetit të të drejtave të pakicave kombëtare në Kosovë e në Serbi, nga ana e Qeverisë së Kosovës, duke e konsideruar këtë përpjekje si “ilaçi i zgjidhjes së problemeve të pakicave në Ballkan”, transmeton Albinfo.ch.

Në anën tjetër, kryeministri i Kosovës, Albin Kurti, ka theksuar se Serbia duhet të distancohet nga e kaluara e saj e përgjakshme, pasi vetëm kështu mund të ecet përpara dhe të normalizohen raportet Kosovë – Serbi.

“Pa u distancuar dhe pa e bërë Serbia një introspeksion për të kaluarën e saj, nuk mund të ecet drejt të ardhmes dhe normalizimit të raporteve me Kosovën”, tha kryeministri Kurti.

 

---