Osmani, në mesin e 11 presidentëve botërorë që u takuan në Pallatin Perandorak në Tokio

U hapën zyrtarisht Lojërat Olimpike. Zonja e Parë e SHBA-së, Jill Biden, u bashkua me personalitete dhe krerë të tjerë shtetesh nga e gjithë bota – përfshirë Princin Albert të Monakos – kur u takua me perandorin japonez Naruhito në Pallatin Perandorak në Tokio të premten, pak përpara ceremonisë së hapjes së Lojërave Olimpike Verore, përcjell albinfo.ch.

E maskuar për t’u mbrojtur nga COVID-19, Jil Biden, 70-vjeçe, përshëndeti mediat teksa hyri në pallat për takime, raporton “Yahoo”.

Në mesin e 11 mysafirëve në këtë takim ishin presidentja e Kosovës, Vjosa Osmani, si dhe presidentët e Armenisë, Francës dhe Polonisë.

Për Jill Bidenin kjo është solo-vizita e saj e parë që kur bashkëshorti i saj, Joe Biden, hyri në Shtëpinë e Bardhë.

Presidentja Osmani ka falënderuar Perandorin Naruhito për mikpritjen dhe për organizimin e Lojërave Olimpike, duke i uruar popullit japonez prosperitet dhe shëndet.

Gjatë pritjes së organizuar nga Perandori Naruhito, presidentja Osmani pati një bisedë të shkurtër edhe me Presidentin francez, Emmanuel Macron, Zonjën e Parë të SHBA-së, Jill Biden, si dhe me përfaqësues të tjerë nga disa vende të botës.