Të aksidentuarit tregojnë si ndodhi rasti tragjik

Dhjetë persona kanë humbur jetën dhe 30 janë raportuar të lënduar

Një aksident i rëndë ka ndodhur sot në Kroaci, ku autobusi i linjës Franfkurt-Prishtinë ka humbur kontrollin dhe është rrokullisur, ku si pasojë 10 persona kanë humbur jetën dhe dhjetëra të tjerë janë lënduar. Në një linje direkte për RTK-në dy nga personat që i kanë mbijetuar këtij aksidenti kanë treguar sesi ka rrjedhur ngjarja, përcjell albinfo.ch.

“Ka ndodh brenda një minute. Vetëm kemi parë se është rrëzuar autobusi. Kemi parë kiamet. Shoferët kanë qenë në gjumë. Ata janë ndërruar kohë pas kohe”, ka thënë njëri prej të mbijetuarve. Një tjetër pasagjer i cili ishte brenda autobusit që u aksidentua, tregoi se të lënduarit janë mirë. “Autobusi ka shkuar zvarrë diku rreth 100 metra. Të lënduarit janë më mirë”, ka pohuar edhe njëri prej lënduarve.

Ndërkohë, kryeministri i Kosovës Albin Kurti është nisur drejt Kroacisë ku do të vizitojë edhe të lënduarit që po trajtohen në spital.

---