Katër vatra aktive të zjarrit në Kosovë

Numri i vatrave aktive me zjarr në vend ka rënë në katër, nga 50 sa ishin.

Kështu ka bërë të ditur zëdhënësi i Agjencisë për Menaxhimin e Emergjencave, Nehat Koqinaj.

“Situata me zjarre në Kosovë, ora 10.00. Numri i vatrave të zjarrit ka rënë. Aktualisht janë aktive katër vatra zjarri”.

Koqinaj bëri të ditur se në Suharekë, rajoni i Prizrenit, janë dy lokacione: Vraniç dhe Bukosh, pastaj Parku Nacional “Bjeshkët e Nemuna” dhe në Janjevë, zjarr fushor dhe malor.

“Në të gjitha këto lokacione, NJPZSH janë në veprim, deri sa në rajonin e Pejës, Bjeshkët e Nemuna në veprim përveç NJPZSH (Njësive Profesionale Zjarre fikje Shpëtim) janë edhe njësi të FSK-së dhe mbështetje sipas kërkesës edhe nga KFOR-i”.

Ndryshe, deri tani lidhur me zjarrvënie, ​Policia e Kosovës ka identifikuar dhe arrestuar dy të dyshuar. Njëri është arrestuar në Zubin Potok dhe tjetri në Babimovc të Obiliqit.