Në fermën e emigrantit që la Italinë për të punuar në vendlindje

Ministrja e Bujqësisë dhe Zhvillimit Rural, Milva Ekonomi vizitoi sot një fermë në Kurbin, e ngritur nga një emigrant, i cili vendosi të kthehej nga Italia për të punuar në vendin e tij.

Ferma shtrihet në një sipërfaqe prej 3 hektarësh dhe në të kultivohet kungull, i cili del më pas në tregun vendas, i kërkuar kryesisht nga bizneset e agroturizmit.

“Gjatë vizitës në fermën e Fatjonit pashë nga afër përkushtimin e tij për të ngritur një biznes në tokën e tij, pas kthimit nga Italia 5 vjet më parë. Ai më tregoi se pas rezultateve të kënaqshme me prodhimin e kungullit në një sipërfaqe prej 3 hektarësh, po investon dhe me pemët frutore, ku ka mbjellë 2 hektarë me kumbulla, shegë etj., të gjitha produkte cilësore të kërkuara nga bizneset agroturistike”, tha Ekonomi, transmeton Atsh, përcjell Albinfo.ch.

Vetë Fatjoni tregon se është kthyer nga Italia që të punoj në Shqipëri.

“Këtë e kam filluar si lojë, por ka dalë një sukses i madh. Kam mbjellë 3 hektarë deri tani dhe prodhimi shkon në tregun shqiptar”, tha ai.