SHBA-ja lavdëron Kosovën dhe Shqipërinë

Për gatishmërinë rreth strehimit të afganëve

Bëhët e ditur se zyrtarë të Shteteve të Bashkuara kanë mirëpritur vendimin e Kosovës dhe Shqipërisë që të strehojnë përkohësisht afganët, që bashkëpunuan me forcat amerikane, teksa talibanët kanë marrë nën kontroll pothuajse tërë territorin e Afganistanit.

Theksohet se Departamenti Amerikan i Shtetit tha se Kosova u është bashkuar thirrjeve për largimin e sigurt të njerëzve nga Afganistani.

“Populli afgan meriton të jetojë i sigurt dhe me dinjitet. Ne në komunitetin ndërkombëtar jemi të gatshëm që t’i ndihmojmë ata”, u tha në deklaratën e Departamentit Amerikan të Shtetit.

Kësaj thirrje të DASH-it i janë bashkuar edhe Shqipëria, Maqedonia e Veriut, Mali i Zi dhe shtete të Bashkimit Evropian.

Më 15 gusht, presidentja e Kosovës, Vjosa Osmani, tha se më 16 korrik është kontaktuar nga ambasadori amerikan në Prishtinë, Philip Kosnett, i cili ia ka përcjellë kërkesën e presidentit Joe Biden që Kosova të strehojë përkohësisht civilët afganë, kërkesë të cilën ajo thotë se e ka pranuar pa asnjë hezitim.

Ndërkaq, Qeveria e Kosovës tha për Radion Evropa e Lirë se janë në kontakt me autoritetet amerikane për strehimin e afganëve dhe shtuan se “gjithçka do të përmbyllet mirë”.

Ndërkaq, Komiteti për Marrëdhënie me Jashtë i Senatit amerikan ka shkruar se mirëpret vendimin e Qeverisë së Shqipërisë që të strehojë afganët.

---