Kosovë: Nis procesi i verifikimit të kandidatëve për kryetarë komunash

Komisioni Qendror i Zgjedhjeve u është drejtuar disa institucioneve të Kosovës për të verifikuar nëse rreth 5 mijë kandidatët e subjekteve politike për zgjedhjet lokale janë në përputhje me nenin 29 të Ligjit për Zgjedhjet e Përgjithshme.

Kjo është bërë e ditur nga zëdhënësi i KQZ-së, Valmir Elezi, i cili në një konferencë për media tha se shkresat për verifikim të kandidatëve janë dërguar në Këshillin Gjyqësor të Kosovës, Ministrinë e Punëve të Brendshme, Ministrinë e Punëve të Jashtme, Ministrinë e Mbrojtjes, Agjencinë e Kosovës për Inteligjencë dhe Dogana të Kosovës.

“Ju njoftoj se janë dërguar në institucione të ndryshme shkresa të veçanta, nga të cilat, në bazë të fushës së përgjegjësisë që mbulojnë, është kërkuar konfirmimi i përshtatshmërisë së kandidatëve me Nenin 29 të Ligjit për Zgjedhjet e Përgjithshme. Këtyre shkresave i është bashkangjitur edhe grupi i parë i listës me emrat e 3 mijë e 205 kandidatëve që u takojnë subjekteve të ndryshme politike dhe të cilët kanë kërkuar nga KQZ-ja që të certifikohen për pjesëmarrje në zgjedhje. Edhe rreth 2 mijë emra të tjera do të dërgohen së shpejti në këto institucione”, tha Elezi.

Ndërkohë, KQZ-ja ka kërkuar përgjigje edhe nga tri ministri, ajo e Punëve të Brendshme, e Punëve të Jashtme dhe e Mbrojtjes, nëse nga lista e kandidatëve ka pjesëtarë të forcave të armatosura, pjesëtarë të Policisë së Kosovës apo përfaqësues diplomatik.

Më 16 gusht është përmbyllur afati për aplikim të subjekteve politike, të cilat duan të marrin pjesë në zgjedhjet lokale të 17 tetorit. Sipas të dhënave të KQZ-së, 94 subjekte politike kanë aplikuar për certifikim, prej të cilave 32 janë parti politike, 1 koalicion, 35 iniciativa qytetare dhe 26 kandidatë të pavarur.