Kosovë: Qeveria mbështet opozitën në propozimin për shkurtimin e fushatës

Propozimi i opozitës në Kosovë për shkurtimin e fushatës zgjedhore për shkak të rritjes së numrit të të infektuarve duket se po gjen mbështetje nga partia shumicë, Vetëvendosje, e cila e udhëheq Qeverinë e Kosovës

Zëdhënësi i Qeverisë, Përparim Kryeziu, për Klankosova ka deklaruar se sikurse në Qeverinë Kurti 1 ata janë të hapur për bashkëpunim.

Madje, ai e ka ripërsëritur edhe një herë deklaratën e ministrit të Shëndetësisë, Arben Vitia, i cili tha se bashkëpunimi nënkupton edhe mospengimin e përpjekjeve të qeverisë për menaxhimin e pandemisë.

“Ne mbështesim propozimin që fushata zgjedhore të jetë sa më e shkurtër, varësisht nga rekomandimet e IKShPK-së. Beteja me pandeminë është betejë e përbashkët, sepse të gjithë përballemi me të njëjtin rrezik, pa dallim. Prandaj, sikurse në Qeverinë Kurti 1, ne jemi të hapur për bashkëpunim. Por, siç ka deklaruar dje ministri i Shëndetësisë, Arben Vitia, bashkëpunim është edhe atëherë kur nuk pengohen përpjekjet e qeverisë për menaxhimin e pandemisë, edhe atëherë kur nuk përhapen dezinformata për vaksina dhe afatin e tyre, e edhe kur respektohen masat e qeverisë. Andaj, le të fillojmë nga kjo formë e bashkëpunimit”, ka thënë Kryeziu, transmeton Albinfo.ch.

Propozimi për shkurtim të fushatës erdhi nga kryetari i Lidhjes Demokratike të Kosovës, Lumir Abdixhiku, propozim ky që mori mbështetje më pas edhe nga dy partitë e tjera në opozitë, PDK dhe AAK.

Ligji për Zgjedhjet në Kosovë e përcakton që periudha e zgjedhjeve duhet të paraprihet nga një fushatë 30-ditore.

---