Kërkohet lehtësim i masave për personat e vaksinuar

Instituti Kombëtar i Shëndetësisë Publike të Kosovës

Asociacioni i Komunave të Kosovës ka bërë të ditur se në takimin e radhës me Qeverinë do të kërkojë lehtësi për qytetarët, të cilët janë vaksinuar me vaksinën kundër COVID-19.

Kështu ka deklaruar kryetari i AKK-së, Sazan Ibrahimi, shkruajnë mediat lokale, përcjell Albinfo.ch.

“Në takimet që kam pasur me kryesuesit e kolegjiumeve të shëndetësisë dhe inspektoratit që veprojnë në kuadër të AKK-së dhe në konsultime me disa kryetarë , të cilët e kanë përkrahur këtë ide, ne si AKK mendojmë që në takimin e radhës me nivelin qendror do të  kërkojmë lehtësi në qasje në jetën publike dhe në gastronomi për qytetarët që janë vaksinuar. Në ditët në vijim do ta diskutojmë edhe me këshillin e kryetarëve”, ka thënë Ibrahimi.

Ai ka shtuar se nëse ka vaksina të mjaftueshme, dhe fillon procesi pa pengesa, me numër të mjaftueshëm të personelit shëndetësor, mendojmë që më mirë është që të ketë lehtësira për qytetarët që janë vaksinuar.

“Me këtë edhe inkurajohet vaksinimi, por edhe ekonomia fiton. Kjo mendojmë që ky veprim të fillojë nga 13 shtatori. P.sh, Gastronomisë t’i lejohet puna edhe brenda lokaleve për personat e vaksinuar, por duke respektuar protokollet kundër COVID-19”, u shpreh Ibrahimi.

Ai shtoi se gjithashtu do të kërkojnë që masat e “orës policore” të mos zbatohen për qytetarët që janë vaksinuar.

“Kjo do të inkurajonte vaksinimin e popullatës, por edhe zhvillimin ekonomik lokal që është shumë i rëndësishëm”, u shpreh ai.