Berisha paralajmëron protesta të reja

Sipas tij, e gjithë Shqipëria do të përfshihet nga protestat

Ish-kreu i PD-së, Sali Berisha, pas përfundimit të protestës së sotme para selisë së PD-së ka paralajmëruar se do të ketë protesta të tjera, të cilat, siç u shpreh ai, do të vazhdojnë në gjithë Shqipërinë.

“Pavarësisht nga këto veprime të një tradhtari të vërtetë që sot nxori më shëmtuar se kurrë fytyrën e tij para shqiptarëve, të Lulzim Bashës, në koordinim me Edi Ramën, ajo çka më ka impresionuar më shumë është vendosmëria totale absolute e protestuesve për të qëndruar të pamposhtur. Ata sot kanë vetëm një pyetje: kur do kthehemi përsëri? Unë i garantoj se Komisioni i Përkohshëm i Rithemelimit të PD-së do t’u japë atyre përgjigje në kohën më të shpejtë. Ne nuk jemi në betejë për një zyrë, ne jemi në betejë kundër një përpjekjeje armiqësore të hapur të Edi Ramës për të asgjësuar pluralizmin politik në Shqipëri. Pra, ne jemi në një mision të një rëndësie të jashtëzakonshme”, tha Berisha, transmeton Albinfo.ch.

---