“Evropa, në rrezikun më të madh të luftës në 30 vjetët e fundit”

Evropa është më afër luftës se sa ka qenë në 30 vjet, paralajmëroi ministri i Jashtëm i Polonisë gjatë raundit të tretë të diplomacisë këtë javë, që synon të qetësojë tensionet mbi kërkesën e Rusisë që Ukraina të mos lejohet të anëtarësohet në NATO, shkruan “Reuters”, përcjell albinfo.ch.

Duke iu drejtuar të dërguarve nga 57 anëtarët e Organizatës për Siguri dhe Bashkëpunim në Evropë (OSBE), Zbigniew Rau, nuk përmendi Rusinë, por renditi një varg konfliktesh, në të cilat pretendohet përfshirja e Moskës.

“Duket se rreziku i luftës në zonën e OSBE-së është tani më i madh se kurrë më parë në 30 vjetët e fundit”, tha Rau në një fjalim, duke përshkruar prioritetet e vendit të tij, ndërsa mban kryesimin e radhës së OSBE-së këtë vit.

“Për disa javë ne jemi përballur me perspektivën e një përshkallëzimi të madh ushtarak në Evropën Lindore”.

Polonia është ndër anëtarët e NATO-s që janë më të ashpër në përballjen me ato që ajo i sheh si ambiciet revizioniste të Rusisë në Evropën Lindore, përcjell tutje albinfo.ch.