Trump premton se nëse zgjidhet president, do të falë protestuesit që hynë në Capitoll Hill

Donald Trump deklaroi se nëse garon për president në 2024-n dhe nëse del fitues, do falë njerëzit që akuzohen për protestat në Capitol Hill.

Trump, që nuk ka konfirmuar ende nëse do të rikandidojë për kryetar shteti pas humbjes përballë Joe Biden në zgjedhjet e 2020-s, foli gjatë një mitingu në Teksas.

“Nëse unë garoj dhe fitoj, ne do t’i trajtojmë protestuesit e 6 janarit në mënyrë të drejtë dhe nëse ata do të kërkojnë falje, ne do t’i falim, pasi aktualisht po trajtohen padrejtësisht”, tha ai, transmeton Euronews, përcjell Albinfo.ch.

Gjatë mitingut, ai kritikoi edhe NATO-n, duke e cilësuar po aq të keqe sa Kina dhe po ashtu planin e Biden për të dërguar trupa në Evropë për të mbrojtur Ukrainën.

Për Trump, trupat duhet të dërgohen në kufirin me Meksikën, ku sipas tij, vetëm vitin e kaluar kaluan ilegalisht drejt Shteteve të Bashkuara 5 milionë persona.

---