Kantonet, të ndara për t’u dhënë fund kufizimeve aktuale Covid

Keystone

Kantonet kishin afat deri të mërkurën për të dhënë mendimin e tyre për dy variantet e propozuara nga Këshilli Federal për t’u dhënë fund kufizimeve aktuale. Shumica e autoriteteve kantonale thanë se ata preferojnë ta bëjnë këtë me një goditje, dhe jo me faza, transmeton albinfo.ch.

Kantonet e vogla të Zvicrës qendrore – Zug, Schwyz, Uri, Nidwalden, Obwalden dhe Glarus – janë me nxitimin për të hequr masat, duke pasur parasysh se ngritja graduale do të ishte shumë e komplikuar dhe e vështirë për t’u kuptuar nga popullata dhe një liri e lëvizjeve do ishte perfekte.

Valais preferon gjithashtu këtë qasje, por vetëm “përderisa numri i rasteve dhe shtrimeve në spital vazhdojnë të ulen deri në mes të shkurtit”. Në të kundërtën, heqja e masave duhet të bëhet me faza.

Megjithatë, Gjeneva, Basel-City, Neuchâtel dhe Jura thonë se është shumë herët për të hequr masat e mbetura. “Është tepër e rrezikshme për momentin, duke pasur parasysh ngarkesën ende të lartë në spitale”, sipas Basel-City, i cili shtoi se “efektet e relaksimeve të para, si puna në distancë dhe karantina, gjithashtu nuk dihen ende”. /Albinfo.ch