Berset: Marrëveshja Zvicër-Shqipëri mbi sigurimet shoqërore sjell ndryshim pozitiv

Zvicra dhe Shqipëria ranë dakord muajin që shkoi që të bashkëpunojnë më ngushtë në fushën e sigurimeve shoqërore

Zv.presidenti dhe ministri zviceran për Çështjet e Brendshme, Shëndetësinë dhe Mbrojtjen Sociale, Alain Berset, vizitoi Shqipërinë në 17-19 shkurt, ku u takua me ministra të qeverisë dhe nënshkroi marrëveshjen për sigurimet shoqërore, përcjell Albinfo.ch.

Ai zhvilloi takime me zv.kryeministrin Arben Ahmetaj, ministren e Shëndetësisë dhe Mbrojtjes Sociale, Ogerta Manastirliu dhe ministren e Financës dhe Ekonomisë, Delina Ibrahimaj.

Vizita erdhi pasi Zvicra dhe Shqipëria ranë dakord që të bashkëpunojnë më ngushtë në fushën e sigurimeve shoqërore. Në marrëveshjen e nënshkruar në 18 shkurt, sigurohet që shtetasit zviceranë dhe shqiptarë të marrin trajtim të barabartë për sa u përket të drejtave të tyre për sigurime shoqërore dhe të kenë qasje më të mirë ndaj këtyre përfitimeve.

“Zvicra po mbështet procesin e reformave në Shqipëri. Sot ne bëmë një hap tjetër të rëndësishëm drejt këtij synimi. Jam i bindur që marrëveshja mbi sigurimet shoqërore sjell ndryshim pozitiv për qytetarët tanë dhe për shkëmbimet ekonomike të të dy vendeve tona”, tha ministri Berset, transmeton atsh.

Marrëveshja e re u mundëson qytetarëve që të marrin pensione edhe kur jetojnë jashtë vendit, ndërsa të dy qeveritë do kenë një bashkëpunim më të mirë në parandalimin e mashtrimeve dhe abuzimeve me sigurimet shoqërore.

Ajo gjithashtu lehtëson lëvizshmërinë e qytetarëve zviceranë dhe shqiptarë dhe i mbron ata nga kontributet e dyfishta të sigurimeve shoqërore.

Zv.presidenti Berset u takua me zv.kryeministrin Arben Ahmetaj dhe diskutuan mbi marrëdhëniet e shkëlqyera midis Shqipërisë dhe Zvicrës, dhe mbi përgjigjen ndaj krizave të tërmetit 2019 dhe pandemisë COVID-19.

Ai gjithashtu takoi ministren e Shëndetësisë dhe Mbrojtjes Sociale, Ogerta Manastirliu dhe vizitoi qendrën shëndetësore në Vorë, të rinovuar më mbështetje zvicerane.

Diskutimet u fokusuan në përpjekjet për t’u përballur me pandeminë, shtrirjen e vaksinimit dhe përvojat e dy vendeve në trajtimin e krizës. Një temë tjetër ishte mbështetja zvicerane për sistemin shëndetësor në Shqipëri.
Zvicra është aktualisht partneri kryesor dypalësh për Shqipërinë në sektorin shëndetësor.

---