Kantoni i Bernës mohon se zonja e Putinit jeton në Zvicër

(KEYSTONE/AP Photo/Bela Szandelszky)

Sipas transmetuesit publik RTS, Qeveria zvicerane nuk ka qenë e shurdhër ndaj raporteve se e dashura e Putinit, Alina Kabaeva, dhe fëmijët e tyre fshihen diku në Zvicër, transmeton albinfo.ch.

“E gjithë kjo trazirë dhe dëmtim i mundshëm i imazhit të Zvicrës përfundoi duke shkaktuar shqetësim në vendet e larta në Bernë dhe në ambasada të caktuara”, raportoi RTS, duke shtuar se çështja urgjente e vendndodhjes së Kabaeva ishte madje në axhendën e task forcës së Këshillit Federal për Ukrainën.

Por deri më tani autoritetet nuk kanë gjetur asnjë gjurmë të saj. Departamenti Federal i Drejtësisë dhe Policisë i tha RTS se “kontrollet e nevojshme janë kryer, por nuk ka asnjë të dhënë për praninë e këtij personi në Zvicër”.