Rritja e çmimeve, diaspora dërgon më shumë para në vendlindje

Në Shqipëri, një në katër familje marrin të ardhura nga emigrantët, para’ që janë burimi i vetëm i jetesës për pjesën dërrmuese të tyre.

Për shkak edhe të rritjes së çmimeve, emigrantët po u dërgojnë shqiptarëve më shumë para për familjet. Sipas të dhënave nga Banka e Shqipërisë, vlera e remitencave në tre muaj e parë të vitit arriti në 184 milionë euro, duke u rritur me gati 9 për qind krahasuar me një vit më parë.

Janë gjithsej 220 mijë familje që jetojnë me këto të ardhura, në pamundësi të një burimi tjetër, transmeton A2, përcjell Albinfo.ch.

Vlera e lartë e remitencave, për ekspertët është edhe tregues i gjendjes ekonomike të familjeve shqiptare.

Sipas të dhënave nga Banka e Shqipërisë, vitin e shkuar remitencat arritën në 761 milionë euro, duke u rritur kështu me 13 për qind në krahasim me 2020-n e gati 9 për qind në raport me periudhën e para pandemisë.

 

 

---