OBSH paralajmëron rrezik ‘të lartë’ të lisë së majmunëve në Evropë

“Kemi vendosur që shpërthimi global i lisë së majmunëve përfaqëson një emergjencë të shëndetit publik me shqetësim ndërkombëtar”, tha shefi i OBSH-së, Tedros Adhanom Ghebreyesus, në një konferencë për shtyp, transmeton albinfo.ch.

Ai tha se një komitet ekspertësh që u mblodhën të enjten nuk ishte në gjendje të arrinte një konsensus, kështu që i takoi atij të vendoste nëse do të shkaktonte alarmin më të lartë të mundshëm.

“Vlerësimi i OBSH-së është se rreziku i lisë së majmunëve është i moderuar globalisht dhe në të gjitha rajonet, me përjashtim të rajonit evropian, ku ne e vlerësojmë rrezikun si të lartë”, shtoi ai.

Lija e majmunëve ka prekur mbi 15,800 njerëz në 72 vende, sipas një raporti nga Qendrat e SHBA-së për Kontrollin dhe Parandalimin e Sëmundjeve (CDC), i publikuar më 20 korrik.

Një rritje e infeksioneve nga lija e majmunëve është raportuar që nga fillimi i majit jashtë vendeve të Afrikës Perëndimore dhe Qendrore, ku sëmundja ka qenë prej kohësh endemike, transmeton tutje albinfo.ch.