Zvicra i bën thirrje Rusisë për kthimin e Krimesë 

(KEYSTONE/Gaetan Bally)

Ministri i Jashtëm zviceran, Ignazio Cassis, i ka bërë sërish thirrje Rusisë që t’i japë fund armiqësive dhe të tërhiqet nga Ukraina, duke përfshirë territorin e Krimesë që e ka pushtuar për tetë vjet, transmeton albinfo.ch.

Në një adresë video në Platformën e Krimesë, Cassis dënoi pushtimin rus të Ukrainës “në termat më të fortë të mundshëm”.

“Integriteti territorial dhe sovraniteti i Ukrainës duhet të rivendoset menjëherë. Unë përsëris mbështetjen e palëkundur të Zvicrës për një Krime ukrainase, për popullin ukrainas që tani po përballet me agresionin ushtarak të Rusisë”, tha ai.

Platforma e Krimesë është një demonstrim ndërkombëtar solidariteti për Ukrainën që u krijua saktësisht një vit më parë. Samiti i dytë i Platformës së Krimesë u organizua më 23 gusht, një ditë para se Ukraina të festonte 31-vjetorin e pavarësisë së saj nga ish-Bashkimi Sovjetik.

Zvicra është një pjesëmarrëse themeluese e Platformës së Krimesë dhe ka refuzuar të njohë pretendimin e Rusisë ndaj Krimesë që nga pushtimi i saj më 2014, transmeton tutje albinfo.ch.