Avioni elektrik E-Sling niset nga Cyrihu

20 studentë në institutin federal të teknologjisë ETH Cyrih kanë festuar fluturimin e parë të suksesshëm të një avioni elektrik

 

Studentët në institutin federal të teknologjisë ETH Cyrih kanë festuar fluturimin e parë të suksesshëm të një avioni elektrik me katër vende, i njohur si e-Sling, të cilin e kanë ndërtuar gjatë studimeve të tyre, transmeton albinfo.ch.

Një ekip prej 20 studentësh punoi në projektin dyvjeçar për të ndërtuar një avion të lehtë të qëndrueshëm me bateri. Ata prezantuan projektin e tyre për shtypin të premten.

Përveç ndërtimit të një motori elektrik efikas, studentët zhvilluan edhe një sistem baterish modulare me një sistem të veçantë ftohjeje. Ata përdorën një dizajn ekzistues avioni nga prodhuesi i Afrikës së Jugut Sling Aircraft për të ndërtuar guaskën për t’iu përshtatur teknologjisë së tyre.

“Të jesh në gjendje të ndërtosh një avion gjatë studimeve dhe më pas ta shohësh atë duke fluturuar është një ndjenjë e papërshkrueshme”, tha studenti i inxhinierisë mekanikem, Maurice Kaulich.

e-Sling është avioni i parë elektrik që është i pajisur me një sistem baterie modulare. Bateritë mund të ndërrohen gjatë një ndalese. Aeroplani aktualisht ka një distancë prej rreth 180 km. Në të ardhmen, ekipi dëshiron të zhvillojë një sistem fuqie hidrogjeni për aeroplanin, i cili mund të rrisë rrezen e avionit.

 

---