Osmani: Nuk ka pasur kërkesë nga SHBA-ja që Kosova të heqë dorë nga njohja reciproke

Presidentja e Kosovës, Vjosa Osmani, ka folur edhe në lidhje me njohjen reciproke.

Ajo e ka quajtur këtë njohje si të vetmen zgjidhje, e cila sjell paqe dhe stabilitet afatgjatë në rajonin tonë.

“Njohja reciproke është e vetmja zgjidhje, e cila sjell paqe dhe stabilitet afatgjatë në rajonin tonë. Janë tjetër. Janë tjetër gjë propozimet për marrëveshje specifike, të cilat diskutohen në Bruksel, siç e dini ka qenë çështja e energjisë, akoma vazhdojnë diskutime për fatin e të zhdukurve me dhunë, marrëveshje të cilën Kosova e shtynë me shumë ngulm, apo edhe tema të tjera që kanë të bëjnë me lirinë e lëvizjes”, u shpreh ajo.

Osmani tha se nuk ka pasur kërkesë nga SHBA-ja që Kosova të heqë dorë nga njohja reciproke, shkruajnë mediat e Kosovës, përcjell Albinfo.ch.

“Megjithatë nuk ka pasur kërkesë qoftë nga SHBA-ja apo partnerët e tjerë brenda BE-së që Kosova të heqë dorë nga njohja reciproke, pasi është domosdoshmëri që të jetë pjesë e marrëveshjes finale”, ka thënë ajo.