Protesta në Prishtinë: “Vrasja e grave nga burrat të trajtohet si urgjencë kombëtare”

kwn - fb

Me moton “Vrasja e grave nga burrat të trajtohet si urgjencë kombëtare”, sot është protestuar në Prishtinë për vrasjen e shtatzënës 35-vjeçare në oborrin e QKUK-së.

Qindra protestues janë mbledhur në sheshin “Zahir Pajaziti”, ku po kërkojnë përgjegjësi institucionale për vrasjen e djeshme.

“Polici, jeni bashkëfajtorë në vrasjen e grave”, “Edhe sa thirrje të humbura”, janë disa nga thirrjet e protestuesve, të cilët po marshojnë drejt Prokurorisë së shtetit, Policisë së Kosovës dhe Qeverisë.

Protestueset para ndërtesës së Qeverisë ripërsëritin kërkesen për legalizimin e sprejit. Ndërsa, hodhën derivate të naftës për të ndezur zjarr para objektit të Qeverisë.

Mbrëmjen e së mërkurës në oborrin e QKUK-së para Klinikës së Gjinekologjisë u vra një 35-vjeçare shtatzënë, e cila ishte në prag të lindjes së një foshnje.

Ish-bashkëshorti i saj është personi i dyshuar për kryerjen e vrasjes, ndërsa i njëjti po kërkohet nga organet e rendit dhe gjendet në arrati.