Ambasadori amerikan dënon sulmet ndaj EULEX-it dhe policisë në veri

Ambasadori i Shteteve të Bashkuara të Amerikës në Kosovës, Jeffrey Hovenier, ka dënuar sulmet ndaj patrullës së EULEX-it dhe Policisë së Kosovës në veri të vendit.

Hovenier ka thënë se sulmet janë të papranueshme dhe se gjithë përgjegjësit e këtyre sulmeve duhet të japin përgjegjësi.

“SHBA i bashkohet EULEX-it në dënimin e fuqishëm të sulmit ndaj një patrulle të EULEX-it mbrëmë. Sulmet e dhunshme ndaj Policisë së Kosovës dhe personelit të sigurisë ndërkombëtare janë të papranueshme dhe autorët duhet të mbajnë përgjegjësi përmes sistemit të drejtësisë kosovare”, ka shkruar Hovenier në Twitter.

Ndërkohë, Misioni i EULEX-it në Kosovë ka konfirmuar se ka ndodhur një sulm me shok-bombë ndaj një patrulle të tyre në veri.

“Konfirmojmë se një bombë çorientuese (shok-bombë) është hedhur ndaj një patrulle vëzhguese të EULEX-it mbrëmjen e kaluar (10.12) në afërsi të Rudares. Asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale”, thuhet ndër të tjera në reagimin e tyre.

Po ashtu edhe Policia e Kosovës ka konfirmuar se është sulmuar me armë zjarri të shtunën mbrëma në veri të vendit.

The U.S. joins #EULEX in strongly condemning the attack on a @EULEXKosovo patrol last night. Violent attacks on Kosovo Police and international security personnel are unacceptable and those responsible must be held accountable through the Kosovan justice system. https://t.co/WZvtW5CE56

— Ambassador Jeff Hovenier (@USAmbKosovo) December 11, 2022