Policia e Kosovës: Situata në veri vazhdon të jetë e brishtë

Policia ka dalë me përmbledhje të situatës në veri, duke thënë se bllokimi i rrugëve nga grupe kriminale në veri të vendit, sulmet me armë zjarri e bomba çorientuese (shok bomba) ndaj Policisë së Kosovës, sulmi me shok bomba ndaj gazetarëve e ndaj patrullës vëzhguese të EULEX-it, ka tensionuar situatën në veri të vendit dhe ka pamundësuar lirinë e lëvizjes së qytetarëve dhe qarkullimit të mallrave në dy pikëkalimet kufitare, Jarinje dhe Bërnjak.

“Një situatë e brishtë ka vazhduar edhe gjatë natës, e tillë vazhdon të jetë edhe sot, andaj Policia e Kosovës sipas detyrës zyrtare po vazhdon fuqishëm angazhimet e saja me njësitet policore në ofrim të sigurisë për të gjithë qytetarët pa dallime, në interes të ruajtjes së rendit dhe sigurisë publike, si dhe sjelljen para organeve të drejtësisë të personave të dyshuar të involvuar në veprimtari kriminale”, tha policia, përcjell Albinfo.ch.

Policia po ashtu demantoi disa media serbe, të cilat raportonin rrejshëm se njësitet speciale të PK-së, te Ujmani “kanë ndaluar dhe maltretuar” një qytetar/punonjës serb dhe kinse kanë marrë objektet në atë lokacion.

“Policia e Kosovës me njësitet e saja është vendosur në rrugën kryesore që shpie në drejtim të pikës kufitare të Bërnjakut, nuk është vendosur në ndonjë objekt të caktuar si dhe nuk ka maltretuar asnjë person apo punonjës, siç është publikuar në media, por vetëm ka legjitimuar një person, i cili ka qenë duke kryer incizime me telefon në atë lokacion, i cili pas legjitimit, ka vazhduar pa asnjë problem”, thuhet në komunikatë.