Arrestohet në veri serbi me 6.300 fishekë, reagon ministri Sveçla

Lidhur me rastin ka reaguar ministri i Punëve të Brendshme, Xhelal Sveçla, i cili ka thënë se përderisa Vuçiq flet për armatosje të Serbisë, në veri të Kosovës konfiskohen 6.300 copë municion të kontrabanduar nga Serbia.

Një serb është arrestuar ditën e sotme në veri të Kosovës, teksa tentoi të fuste në fshatin Joshanicë të Leposaviçit 6 mijë e 300 fishekë.

Organet e rendit kanë njoftuar se i dyshuari 42-vjeçar me inicialet J. Zh, është shoqëruar në polici dhe ku më pas është intervistuar, ndërsa ndaj tij është ngritur rasti penal dhe me aktvendim nga prokurori, është dërguar në paraburgim deri në 48 orë, raporton Albinfo.ch.

Lidhur me rastin ka reaguar ministri i Punëve të Brendshme, Xhelal Sveçla, i cili ka thënë se përderisa Vuçiq flet për armatosje të Serbisë, në veri të Kosovës konfiskohen 6.300 copë municion të kontrabanduar nga Serbia.

“6.300 sasi të municionit janë konfiskuar sot nga Njësiti i Ndërhyrjes së Shpejtë të kufirit në Joshanicë, në veri të Kosovës. Gjatë patrullimit është ndaluar vetura e dyshimtë me targa të serbisë e një shtetasi serb dhe njësitet relevante tashmë kanë ndërmarrë veprimet e nevojshme”, ka njoftuar Sveçla. 

Tutje, ai ka thënë se kjo rithekson sërish faktin se grupe të caktuara, të orkestruara dhe mbështetura nga Beogradi synojnë dhe angazhohen maksimalisht që të destabilizojnë Kosovën.

“Do të vazhdojmë pandalshëm angazhimin tonë në luftimin e çdo lloj kriminaliteti që synon të cënojë sigurinë e vendit tonë dhe të qytetarëve tanë”, ka shkruar Sveçla në Facebook./Albinfo.ch/

---