Konsumimi i mishit të bardhë të pulës në Kosovë, 94 për qind i importuar

Prodhimi vendor i mishit të bardhë të pulës është vetëm 6 për qind, ku pjesa tjetër vjen nga importi.

Kështu ka thënë deputetja e Lëvizjes Vetëvendosje Mirlinda Tishukaj – Sadiku gjatë pyetjes drejtuar ministres së Tregtisë, Rozeta Hajdari duke shtuar se çfarë po bëhet që të ketë masa mbrojtëse për këtë produkt.

“Gjatë vitit 2020 kemi import të mishit në vlerë prej 38.9 milionë euro, në vitin pasues është shifra 51.5 milionë euro dhe për vitin 2022 sipas parashikimeve kjo shifër do të arrij në 60 milionë euro. Sipas njohësve, Kosova i plotëson nevojat vetëm 6 për qind, pra me prodhim vendor, kurse 94 për qind mbulohet nga importi”, është shprehur Tishukaj – Sadiku, përcjell Telegrafi.

Ndërsa, Hajdari ka thënë se në Kosovë është vetëm një kompani e licencuar për prodhim të mishit të bardhë të pulës.

“Për sa i përket importit të mishit të pulës, ne si ministri e kemi konsultuar legjislacionin në fuqi që ka të bëjë me masat mbrojtës, si nga Dogana e Kosovës, Shoqata e Shpezëtarëve dhe Agjencia e Ushqimit dhe Veterinës. Kemi të licencuar një kompani të mishit të bardhë të pulës dhe për më shumë kemi kuptuar se edhe pse kemi rritje në prodhim por nuk kemi plotësim të nevojës së kërkesave”, tha Hajdari.