Cramon: Takimi në Ohër, hap i madh drejt integrimit evropian për të dy vendet

Raportuesja për Kosovën në Parlamentin Evropian, Viola von Cramon, shpreson që Kosova dhe Serbia ta nënshkruajnë marrëveshjen për Planin Evropian në takimin në Ohër.

Në një postim në Twitter, Viola von Cramon tha se ky do të jetë një hap i madh drejt BE-së për të dy shtetet.

Viola von Cramon komentoi deklaratën e ambasadorit gjerman në Kosovë, Jorn Rohde, i cili i bëri thirrje Kosovës dhe Serbisë që të mos e humbin rastin në Ohër, duke thënë se marrëveshja do të përshpejtojë integrimin euroatlantik dhe do të ofrojë një mundësi historike në rrugën e plotë drejt normalizimit dhe njohjes reciproke.

“Shpresoj shumë që do të shohim të dyja nënshkrimet nën marrëveshje në fund të javës së ardhshme në Ohër. Do të jetë një hap i madh drejt integrimit evropian për të dy vendet”, shkroi Von Cramon.