Vuçiq: Nuk ka njohje dhe anëtarësim në organizata ndërkombëtare për Kosovën

Pas arritjes së marrëveshjes në Ohër, Kosova e Serbia janë të obliguara të nisi zbatimin e aneksit për normalizim të marrëdhënieve, edhe pse nuk nënshkruan asgjë.

Megjithatë, presidenti i Serbisë, Aleksandar Vuçiq, është ai që thotë se nuk do ta zbatojë një marrëveshje që e lejon anëtarësimin e Kosovës në Kombet e Bashkuara. “Nuk ka bisedime për anëtarësimin në Kombet e Bashkuara dhe nuk ka njohje. Çdo gjë tjetër që nënkupton normalizim të vërtetë të raporteve, pa tensione dhe pa konflikte, Serbia do t’i zbatojë”, deklaroi Vuçiq më 21 mars, pasi u takua në Beograd me kryediplomatin e Italisë, Antonio Tajani, raporton Radio Evropa e Lirë, përcjell albinfo.ch.

Edhe pse Kosova e Serbia nuk nënshkruan asnjë dokument, Bashkimi Evropian thotë se palët duhet të zbatojnë çdo pikë që del nga aneksi i dakorduar në Ohër, ndryshe për vendet do të ketë pasoja në procesin e integrimit të tyre evropian dhe po ashtu edhe në aspektin financiar e ekonomik.

Marrëveshja, që njihet edhe si propozimi evropian, kërkon nga Beogradi që të mos e pengojë Kosovën të anëtarësohet në organizata ndërkombëtare, shkruan REL, përcjell albinfo.ch.