PSD proteston kundër marrëveshjes

Protesta e PSD

Në Kosovë është protestuar kundër Marrëveshjes për normalizimin e marrëdhënieve mes Kosovës dhe Serbisë. Partia Socialdemokrate i priu kësaj proteste, e kreu i saj tha se marrëveshja paraqet “një faqe të keqe”, duke e akuzuar Qeverinë e kryeministrit Albin Kurti se po themelon Asociacionin e Komunave me shumicë serbe. “Askush në Kosovë nuk beson se duhet të krijohet entitet politik, paralel e etnik. Andaj, besojmë se duhet të vazhdojmë përpjekjet tona për të ndalur Qeverinë, e cila është e qartë se u dorëzua para nevojës për të mbajtur pushtet”, tha Molliqaj në protestën para ndërtesës së Qeverisë së Kosovës, shkruan Radio Evropa e Lirë, përcjell albinfo.ch.

Para Qeverisë së Kosovës nga protestuesit u shpërnda edhe tym i zi, derisa flamujt e Kosovës u zëvendësuan me flamuj të bardhë për të shënjuar siç u shprehën PSD, dorëzimin e Kurtit në themelimin e Asociacionit të komunave me shumicë serbe.

Më 27 shkurt në Bruksel, Kosova dhe Serbia u pajtuan për Marrëveshjes drejt normalizimit të raporteve mes shteteve, apo siç njihet ndryshe, edhe si propozimi evropian. Më 18 mars palët u pajtuan në Ohër për aneksin e zbatimit të kësaj marrëveshjeje, shkruan REL, përcjell albinfo.ch.