Vritet roja e sigurisë nga gjuajtja me armë drejt objektit të Top Channel

Top Channel

Orët e para të së hënës është qëlluar me armë zjarri në drejtim të objektit të medias Top Channel, ku ka mbetur i vdekur roja e sigurisë, Pal Kola, 60 vjeç. Rrethanat ende mbesin të paqarta mbi motivet dhe të dyshuarit. Deri më tani bëhet e ditur që në autostradën e Kavajës, tek vendi i quajtur “Përroi i Agait”, është gjetur një mjet i djegur tip “Range Rover”, i cili dyshohet se u përket autorëve, shkruan Top Channel, përcjell albinfo.ch.

Sipas informacioneve, targat e mjetit rezultojnë të vjedhura dhe arma e përdorur është AK47.

Policia njofton se më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel dhe se është ngritur grupi hetimor nën drejtimin e Prokurorisë dhe vijon puna intensive për zbardhjen e rrethanave të ngjarjes, sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve. Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve, thuhet në njoftimin e policisë, përcjell albinfo.ch.