Gërvalla: Serbia, joserioze në dialog

Kryediplomatja kosovare, Donika Gërvalla, për mediumin portugez “Diaro de Nolicias” ka thënë se nga Serbia duhet qasje serioze në procesin e dialogut. “Është kaq e vështirë me Serbinë. Ata ulen në tryezën e bisedimeve dhe premtojnë dhe pastaj vjen një Serbi krejtësisht tjetër kur bëhet fjalë për zbatimin e premtimeve. Kësaj radhe Serbia as që nënshkroi, kështu që nuk jam optimiste për të pritur ndryshime në javët apo muajt e ardhshëm”, tha ajo, përcjell albinfo.ch.

Sipas ministres së Jashtme, Serbia nuk qe gati për marrëveshje në Bruksel as më 27 shkurt, e as më 18 mars. “Serbia vazhdon lojën e vjetër të transmetimit të mesazheve dhe më pas kur vjen koha për nënshkrim, refuzon. Është për të ardhur keq që BE-ja po e mundëson këtë situatë dhe nuk po i zgjidh sfidat e dialogut që po ndërmjetëson”, tha ajo, shkruan koha.net, përcjell albinfo.ch.

Gërvalla po ashtu deklaroi se Kushtetuta e Kosovës, si produkt i politikës evropiane, u garanton të drejta të gjera pakicave, me theks të veçantë serbëve. “Kjo udhëheqje serbe s’është aspak e interesuar ta çojë Serbinë në BE. Këtë e thonë çdo ditë. Nëse i shikojmë sondazhet, shohim se edhe njerëzit në Serbi, shumica, s’janë pro anëtarësimit të Serbisë në BE. Kjo do të thotë se të gjitha vendet tona që po bëjnë përparim, për shembull, Kosova po bën përparim të madh në çështjet e sundimit të ligjit sipas standardeve evropiane, duhet të presin derisa Serbia, që i shërben interesave të Rusisë, të ndahet nga ajo, ose të ketë rrugë ku i plotësojnë kushtet për të hyrë në BE. Besoj se BE-ja nuk është shumë e sinqertë në ofertën që i bën Ballkanit Perëndimor për integrim dhe kjo është pjesë e problemit. Nëse oferta është e sinqertë, atëherë përpjekjet e rajonit do të konsiderohen të mjaftueshme”, tha kryediplomatja, shkruan koha.net, përcjell albinfo.ch.