Konjufca thotë se mori garanci nga DASH për Asociacionin sipas Kushtetutës

FB: Glauk Konjufca

Kryetari i Kuvendit të Kosovës, Glauk Konjufca, po qëndron në vizitë zyrtare në Shtetet e Bashkuara të Amerikës. Gjatë ditës është takuar me të dërguarin special të SHBA-së për Ballkanin Perëndimor, Gjabriel Escobar.

Konjufca tha se kanë diskutuar për zhvillimet politike në vend dhe rajon, e po ashtu edhe për dialogun Kosovë-Serbi e marrëveshjen për normalizim, përcjell albinfo.ch.

Tutje kreu i Kuvendit u shpreh se Departamenti Amerikan i Shtetit garanton se Asociacioni i komunave me shumicë serbe, si detyrim nga Marrëveshja për normalizim, nuk do të themelohet në atë mënyrë që e cenon shtetësinë e Kosovës.

“Ritheksuam qëndrimin e shtetit të Kosovës, por edhe garantimin e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, pavarësinë, integritetin territorial dhe rendin kushtetues të Republikës së Kosovës”, ka shkruar Konjufca, përcjell albinfo.ch.