Fillon seanca gjyqësore ndaj ish-krerëve të UÇK-së

Në Hagë, pranë Dhomave të Specializuara ka nisur seanca fillestare ndaj ish-krerëve të Ushtrisë Çlirimtare të Kosovës.

Zyra e Prokurorit të Specializuar ka kohë pesë orë për fjalët hyrëse.

Ndërkohë para trupit gjykues edhe një herë Hashim Thaçi, Jakup Krasniqi, Rexhep Selimi, Kadri Veseli janë deklaruar të pafajshëm.

Jakup Krasniqi është shprehur se nuk e kupton se si është përpiluar aktakuza.

“E kam vështirë të kuptoj akuzën e se si është përpiluar, unë nuk kam asnjë lidhje me asnjë prej pikave. E kuptoj siç është, nuk pajtohem me të sepse nuk mbaj asnjë përgjegjësi për pikat. Jam plotësisht i pafajshëm”, është shprehur Krasniqi, përcjell albinfo.ch.

Rexhep Selimi e Hashim Thaçi po ashtu deklaruan se janë të pafajshëm në pikat e aktakuzës së ngritur nga Zyra e Prokurorit të Specializuar.

E Kadri Veseli po ashtu ka shprehur pakënaqësinë e tij me vonesat nga gjykata. “Shpreh pakënaqësinë time me vonesat prej dy vjet e gjysmë, por ju falënderoj. Tërësisht i pafajshëm”, ka deklaruar Veseli, përcjell albinfo.ch.