As pas liberalizimit, kosovarët nuk mund të udhëtojnë në Spanjë

Pixabay: Ilustrim

Edhe pas liberalizimit të vizave, që vlen për të gjitha vendet e zonës Schengen, qytetarët që kanë pasaporta të Kosovës nuk do të mund të udhëtojnë në Spanjë, përcjellë albinfo.ch.

Një gjë e tillë vjen pasi që ky vend anëtar i Bashkimit Evropian nuk i njeh pasaportat e Kosovës. Këtë e ka konfirmuar, zëdhënësja e Komisionit Evropian për Çështje të Brendshme, Anitta Hipper.

E pyetur nëse qytetarët e Kosovës do të mund të udhëtojnë në Spanjë, ajo nuk e përmendur në mënyrë specifike këtë vend, vetëm ka thënë se liberalizimi nuk do të vlejë për “një shtet”, shkruan Radio Evropa e Lirë.

“Njohja e dokumenteve të udhëtimit është një kompetencë shtetërore. Në mesin e vendeve të Schengenit, të gjithë, pos një vendi, i kanë njohur dokumentet e udhëtimit të Kosovës. Kjo do të thotë se liberalizimi i vizave për Kosovën do t’iu mundësojë bartësve të pasaportave të Kosovës që të udhëtojnë pa viza në të gjitha këto vende, pos në njërin prej tyre”, raporton REL.

Spanja, e cila prej 1 korrikut merr edhe kryesimin e Bashkimit Evropian, është më e zëshme sesa katër vendet tjera të BE-së që nuk e kanë njohur shtetësinë e Kosovës.

Megjithatë, gjatë procesit të miratimit të vendimit për vizat, Spanja nuk ka kundërshtuar. Vendet e tjera që nuk e njohin Kosovën janë: Greqia, Qiproja, Rumania dhe Sllovakia, por njohin pasaportat.

Më 18 prill, Parlamenti Evropian e ka miratuar vendimin për vizat, që parasheh që qytetarët e Kosovës, të udhëtojnë pa viza në vendet e zonës Schengen, prej 1 janarit të vitit 2024, përcjellë albinfo.ch.