Vuçiq thotë se pas zgjedhjeve, Prishtina “pushton” veriun

Presidenti i Serbisë, Aleksandar Vuçiq, është shprehur se serbët e Kosovës janë në një situatë të vështirë pasi nuk do të marrin pjesë në zgjedhjet e 23 prillit.

Vuçiq thotë se do të ketë pushtim të plotë nga Prishtina pas zgjedhjeve lokale, shkruan Radio Evropa e Lirë.

“Nesër, populli ynë me qetësi, përgjegjësi dhe përbuzje do t’i shikojnë ata që do të vijnë nga Mitrovica e Jugut për të votuar që të zgjidhet udhëheqje e re në Mitrovicë të Veriut, Leposaviq, Zveçan dhe Zubin Potok. Çfarë do të ndodhë më pas, do të jetë një pushtim i plotë për të cilin qytetarët tashmë janë gati, janë mësuar. Ata do të jenë të qetë, do të jenë të përgjegjshëm, ne do të paguajmë rrogat si më parë, do të luftojmë edhe më shumë për ta, do të ngremë standardet dhe do të presim për kohë më të mirë në të cilën, Karta e OKB-së do të jetë e vlefshme si dhe e drejta publike ndërkombëtare”, tha Vuçiq më 22 prill, raporton agjencia serbe e lajmeve, Beta, përcjellë albinfo.ch.

Presidenti serb po ashtu ka përsëritir kërkesën se serbët nuk kthehen në institucionet e Kosovës pa i themeluar Asociacioni i Komunave me shumicë serbe.

Të dielën e 23 prillit votohet për kryetar në katër komunat veriore, Zveçan, Zubin Potok, Leposaviq dhe Mitrovicë e Veriut.