Kurti: Isha i gatshëm të nënshkruaja draftin e Asociacionit

Zyra e kryeministrit

Gjatë së martës, kryeministri i Kosovës Albin Kurti ka deklaruar se ishte i gatshëm të nënshkruaj draft-statutin e Asociacionit të Komunave me shumicë serbe.

“Në takimin e Ohrit kam pranuar që draft-statutin ta shkruaj unë por me ato tri shtyllat parimore që duhet pranuar parimisht. Një gjë e tillë u refuzua dhe mua mu tha nga ndërmjetësit që këtë duhet ta bëjë ekipi menaxhues si pasojë e marrëveshjeve të mëhershme në dialogun e Brukselit para një dekade”, ka thënë ai.

“Pra tash i përket ndërmjetësit që ta përcaktojë agjendën e takimit të datës 2 maj, ndërkaq unë do ta takoj në një konferencë ndërmjetësin Lajçak. Nuk ka anëtar të grupit punues nga ana jonë. Unë e kam zëvendësin tim i cili në portofolin e tij është përgjegjës për integrimet evropiane. I përket ekipit menaxhues që të shfaqet por ministri Elbert Krasniqi i ka bërë ftesë për takim atyre por që nuk kanë pranuar”, është shprehur ai, përcjellë albinfo.ch.

Me ndërmjetësim të Bashkimit Evropian kryeministri i Kosovës, Albin Kurti dhe Presidenti i Serbisë, Aleksandar Vuçiq do të takohen me 2 maj në Bruksel.

Në agjendë do të jetë deklarata e përbashkët për të pagjeturit dhe drafti i statutit të Asociacionit të komunave me shumicë serbe, si dy pikat urgjente të dala nga Marrëveshja për normalizim të marrëdhënieve mes Kosovës dhe Serbisë, përcjellë albinfo.ch.