Kosova mund të ndalojë përdorimin e Tik Tok-ut për zyrtarët publikë

Pixabay

Në Kosovë, Agjencia për Informim dhe Privatësi e Kosovës do të iniciojë takime me institucionet e sigurisë së Kosovës për të analizuar nëse aplikacioni TikTok paraqet rrezik për sigurinë shtetërore, shkruan Radio Evropa e Lirë.

Kosova duket se do t’u bashkohet Shteteve të Bashkuara të Amerikës dhe Kanadasë e Bashkimit Evropian, vende këto që ndaluan përdorimin e aplikacionit Tik Tok në telefonat dhe pajisjet e tjera elektronike të zyrtarëve shtetërorë, përcjell albinfo.ch.

“Gjatë raportimit në Kuvend gjatë kësaj jave jam pyetur nga njëri prej deputetëve të Komisionit për siguri, lidhur me rrezikun që mund të ofrojë platforma TikTok dhe mundësinë e ndalimit të kësaj platforme, konkretisht që të mos përdoret nga ana e qytetarëve të Kosovës. Kështu që, Agjencia do ta marrë përsipër që të iniciojë takimet me aktorët e sigurisë dhe mbrojtjes dhe më pas do të shohim se cilat janë vlerësimet që do të dalin pas një analize”, thotë Krenare Sogojeva-Dërmaku për Radion Evropa e Lirë.

Kjo analizë do t’u dërgohet institucioneve më të larta shtetërore, Qeverisë dhe Kuvendit që kanë të drejtë për të marrë një vendim të tillë.
TikTok-u është aplikacion i popullarizuar për shpërndarjen e videove të shkurtra, kompania amë e së cilës, ByteDance, e ka bazën në Kinë, përcjell albinfo.ch.