Ky kanton vështirëson edhe më tej marrjen e pasaportës zvicerane

Deputetët votuan për të shtrënguar rregullat e natyralizimit kantonal

Parlamenti i Aargaut pranoi një mocion që kërkon të bëjë më të rrepta kushtet për natyralizime, përcjell albinfo.ch.

Rregulli kërkon një “njohuri të mirë të gjermanishtes, si një parakusht për natyralizim”, niveli B2 si me shkrim, ashtu edhe me gojë, i cili është më i lartë se niveli aktual i B1 me gojë dhe A2 me shkrim – një standard në shumicën e kantoneve.

Edhe para lëvizjes së së martës, kriteret e natyralizimit të Aargaut ishin tashmë ndër më të rreptat në Zvicër.

Në vitin 2020, 64 për qind e votuesve të kantonit miratuan një ligj, sipas të cilit kandidatët që kanë marrë ndihmë sociale për një periudhë 10-vjeçare para aplikimit nuk do të kishin të drejtë për shtetësi. Në kantonet e tjera, periudha është tre vjet.

---