Vetura kroate po konsiderohet një nga makinat më luksoze, kushton miliona euro

Vendoset një rekord i ri botëror kur bëhet fjalë për përshpejtimin nga 0 në 400 km/h dhe ndalimin sërish në 0 km/h

Rimac Nevera, vetura që po vazhdon të thyejë rekorde, gjatë vetëm një dite vozitjeje në pistën e testimit në Gjermani ka thyer deri në 23, shkruan Autoblog, përcjell albinfo.ch.

Nevera u testua në objektin e Testimit të Automobilave në Papenburg (ATP), ku shfrytëzoi në maksimum rrugët katër kilometra të gjata. Përfaqësuesit nga Dewesoft dhe RaceLogic ishin të pranishëm për të konfirmuar rekordet dhe zbuluan se hipermakina elektrike ishte në fakt më e shpejtë se sa mendohej.

Nevera me goma Michelin Cup 2 R, shkoi nga 0 në 60 km/h në 1.74 sekonda, që është më e shpejtë se ajo “zyrtare” 1.85 sekonda. Vetura përshpejtoi nga 0 në 100 km/h për 1.82 sekonda sipas RaceLogic, ose 1.81 sekonda sipas Dewesoft. Kjo e ka kaluar kohën që kanë “raportuar” nga Rimac, e cila është 1.97 sekonda.

Pasi u la të kuptohet më herët nga kreu i kompanisë, Mate Rimac, Nevera vendosi një rekord të ri botëror kur bëhet fjalë për përshpejtimin nga 0 në 400 km/h dhe ndalimin në 0 km/h. Ajo “punë” u krye nga përbindëshi elektrik për 29.94 sekonda, dhe për krahasim, Koenigsegg Regeras, që e kishte deri tash vendin e parë, iu deshën 31.49 sekonda për të njëjtën detyrë më 2019-ën.

Ndër rekordet e Neveras është distanca më e shkurtër e nevojshme për të ndaluar me një shpejtësi prej 100 km/h, që është 29.12 metra sipas RaceLogic, ose 28.96 metra sipas Dewesoft.

Nevera prodhohet në Kroaci dhe kushton miliona euro.

 

---