Mblidhen ministrat e jashtëm të vendeve të BE-së, temë dialogu Kosovë-Serbi

Council of Europe

Këshilli i Punëve të Jashtme i Bashkimit Evropian mblidhet sot në Bruksel.

Ministrat e vendeve anëtarë në agjendë kanë diskutimin për situatën në rajonin e Ballkanit Perëndimor, shkruan Radio Evropa e Lirë.

Atyre do t’iu bashkohen edhe ministrat e Punëve të Jashtme nga gjashtë vendet e Ballkanit Perëndimor.

Sipas njoftimeve nga Bashkimi Evropian temat kryesore që do të jenë në rend dite janë procesi i normalizimit të raporteve mes Kosovës dhe Serbisë, situata në Bosnjë e Hercegovinë, bashkëpunimi rajonal dhe ndikimi i Rusisë në rajonin e Ballkanit Perëndimor, përcjell albinfo.ch.

Sa i përket dialogut mes Kosovës dhe Serbisë, pritet të përsëritet thirrja për progres në procesin e normalizimit të raporteve dhe zbatimin e të gjitha obligimeve.

Pas udhëzimeve që liderët e BE-së dhe të Ballkanit Perëndimor kanë dhënë nga samitet e Bërdos në vitin 2021 dhe Tiranës në vitin 2022, Bashkimi Evropian ka asistuar partnerët që të zhvillojnë kapacitetet e tyre për t’u përballur me kërcënimet hibride, posaçërisht ato kibernetike dhe me fushatat e manipulimit dhe ndërhyrjes nga faktorë të jashtëm, shkruan REL.