Të enjten betohen kryetarët e tri komunave të tjera të veriut

@albinfo.ch

Të enjten do të betohen edhe tre kryetarët e tjerë të komunave veriore Leposaviq, Zubin-Potok dhe Zveçan.

Betimin do ta bëjnë në orën 10:00, në objektet publike të komunave dhe jo tek asambletë komunale, shkruan koha.net.

Sekretari i PDK-së, Betim Gjoshi, thotë se gjatë së martës do të dalin me një njoftim zyrtar në lidhje me përcaktimin e datës për betimin e tre kryetarëve në komunat veriore.

“Me kërkesë të MAPL-së, është caktuar data 25 maj për betimin e kryetarëve në tri komunat veriore në objektet publike të komunave”, tha sekretari Gjoshi, përcjell albinfo.ch.

Ilir Peci dhe Izmir Zeqiri nga radhët e PDK-së pritet të betohen si kryetar i Zveçanit, respektivisht i Zubin Potokut, kurse Lulzim Hetemi nga Lëvizja Vetëvendosje pritet të betohet si kryetar i Leposaviqit.

Të premten e javës së kaluar Erden Atiq është betuar si kryetar i Mitrovicës së Veriut.