Bernë, nisma e nisur për të lehtësuar procesin e natyralizimit

pixabay

Të huajt që kanë jetuar dhe punuar në Zvicër për të paktën pesë vjet – në vend të 10 vjet siç kërkohet aktualisht – duhet të jenë në gjendje të aplikojnë për një pasaportë zvicerane, përcjell albinfo.ch.

Këtë kërkon “Iniciativa Popullore për një të Drejtë Kombëtare moderne (Iniciativa për demokraci)”, e cila u lansua të martën në Bernë.

Lëvizja drejtohet nga një organizatë e quajtur Aktion Vierviertel në gjermanisht dhe Action Quatre Quarts në frëngjisht.

“Pjesëmarrja politike është një nga gurët e themelit të demokracisë. Kushdo që duhet t’u bindet ligjeve, duhet [edhe] të ketë fjalën”, tha shoqata, duke theksuar se kjo e drejtë i mohohet një të katërtës së popullsisë, ose dy milionë të huajve, të cilët megjithatë kontribuojnë në jetën ekonomike, kulturore dhe sociale të Zvicrës.

Organizata ka afat deri më 23 nëntor 2024 për të mbledhur 100,000 nënshkrimet që nevojiten për të nisur një referendum.