Arrestohet drejtori i Shtëpisë së Kulturës në Bujanoc

Ardita Sinani, Facebook

Shefi i Kabinetit të Presidentes Vjosa Osmani, Blerim Vela, ka njoftuar se drejtori i Shtëpisë së Kulturës në Bujanoc, Jetmir Ismaili, është arrestuar nga Policia e Serbisë.

Sipas Velës, ai u arrestua pasi lejoji shfaqje që ishin të financuara nga Qeveria e Kosovës.

“Policia e Serbisë arrestoi kryetarin e Shtëpisë së Kulturës në Komunën e Bujanocit, Jetmir Ismaili, një shqiptar vendas për lejimin e shfaqjes teatrale të financuar nga institucionet e Kosovës! Represion i egër nga regjimi i Vuçiqit. Z. Ismaili duhet të lirohet menjëherë nga paraburgimi”, shkroi Vela, përcjell albinfo.ch.

Për arrestimin ka reaguar edhe Ardita Sinani, këshilltare e Kryeministrit të Kosovës, Albin Kurti, dhe ish-kryetare e Komunës së Preshevës, ajo tregon se përpos Ismailit është arrestuar edhe Gani Veseli, regjisor i shfaqjes.

“Situata gjithnjë ka qenë e qartë për ata që kanë dashur të shohin, por edhe nëse kanë injoruar realitetin, Serbia sërish na e thekson. Imagjinoni, në shekullin XXI, vitin 2023, në kontinentin e Evropës, policia e Serbisë ka marrë në shtëpinë e tij në Nesalcë drejtorin e Shtëpisë së Kulturës, Jetmir Ismailin dhe regjisorin e shfaqjes, Gani Veseli. Më e papranueshme se kjo është vetëm iluzioni i disave që besojnë se Serbia ka ndryshuar. Ajo është po ajo e njëjta që nuk duron asgjë shqiptare”, shkruan Sinani.