24 vjet nga çlirimi i Kosovës

12 qershori shënon Ditën e Çlirimit të Kosovës. 24 vjet më parë trupat paqeruajtëse të NATO-s hynë në Kosovë, për të shënuar kështu edhe përfundimin e largimit të forcave serbe.

Kapitullimi i ish-Republikës së Jugosllavisë u bë me nënshkrimin e Marrëveshjes së Kumanovës. Para së të nënshkruhej dhe të miratohet Rezoluta 1244 e Kombeve të Bashkuara për Kosovën, mijëra trupa të vendeve të NATO-s ishin vendosur në dy shtete, në Shqipëri dhe në Maqedoninë e Veriut, përcjell albinfo.ch.

Trupat e para që u futen në Kosovë ishin trupat e Mbretërisë së Bashkuar, të cilat erdhën së pari në Kaçanik dhe vazhduan rrugën deri në Prishtinë. Grupi i Betejës i Gardës Irlandeze të Mbretërisë ishin ushtarët e parë që rrugëtuan nga Kaçaniku në kryeqytet.

Kjo ditë në Kosovë do të shënohet me aktivitete të shumta.

Do të bëhen homazhe tek varri i ish-presidentit Ibrahim Rugova, varri i veprimtarit Adem Demaçi, nderime dhe homazhe në Kompleksin Memorial “Adem Jashari”, Prekaz, nderime tek pllaka përkujtimore e ushtarëve të rënë të NATO-s, në Prishtinë etj., përcjell albinfo.ch.