Reagon Petkoviq pas arrestimit të Milun Milenkoviqit për sulm ndaj KFOR-it

FB: Petar Petkovic

Shefi i të ashtuquajturës zyra për Kosovë në Qeverinë e Serbisë, Petar Petkoviq ka reaguar pas arrestimit të Milun Milenkoviq, ai thotë se ky i fundit është përndjekur nga Policia e Kosovës.

“Është arrestuar Milun Milenkoviq Lune, i cili është ndjekur me muaj nga policia e Kosovës dhe është kërcënuar me arrest, sepse është luftëtar i shquar i interesave kombëtare serbe. Ai është arrestuar në një sallon flokësh, i cili ishte i zënë nga tetë automjete të blinduara”, ka thënë Petkoviq, shkruajnë mediat serbe.

Sipas Petkoviq, i arrestuari Milenkoviç nuk është një kriminel, por një sportist i shquar dhe me medalje me të cilin stërviten shumë fëmijë, përcjell albinfo.ch.

“Një numër i madh i automjeteve të policisë së Kosovës kanë hyrë nga drejtimi i pjesës jugore të qytetit dhe një numër i madh i pjesëtarëve të policisë së Kosovës, të cilët kanë hedhur gaz lotsjellës, në drejtim të kalimtarëve të rastësishëm”, tha tutje kryenegociatori i Serbisë në dialogun me Kosovës.

Petkoviq shton se Policia e Kosovës po mban nën kërcënimin e armëve qytetarët serbë.

“Është policia e vërtetë e Kurtit, e cila në veri shërben vetëm për të ngacmuar popullin serb. I bëjmë thirrje KFOR-it që të ndërhyjë urgjentisht, për të larguar forcat policore Rosa nga veriu i Kosovës dhe pushtuesit që sulmojnë popullin serb. Përderisa ata janë të pranishëm në veri, nuk do të ketë paqe për popullin serb”, tha Petkoviq, përcjell albinfo.ch.