Nëntë gazetarë të lënduar në Leposaviq

Policia e Kosovës ka njoftuar se nëntë gazetarë janë sulmuar nga huliganët në Leposaviq të premten. Sipas Policisë, gazetarët e sulmuar kanë qenë me detyrë zyrtare, duke përcjellë zhvillimet në komunën e Leposaviqit pas vizitës së ministrit të Administrimit të Pushtetit Lokal, Elbert Krasniqi. Disa prej tyre kanë pësuar lëndime trupore.

“Po ashtu në afërsi të Komunës së Leposaviqit nga individ/grupe kriminale është hedhur një mjet, dyshohet shok bombë, si dhe janë sulmuar fizikisht në mënyrë brutale disa gazetarë të mediumeve të ndryshme të Kosovës. Bazuar në informacionet e deritanishme bëhet fjalë për nëntë gazetarë të sulmuar, të cilët kanë qenë me detyrë zyrtare, duke përcjellë zhvillimet pranë Komunës së Leposaviqit, ku disa prej tyre përveç shqetësimeve, kanë pësuar edhe lëndime të ndryshme trupore, si dhe kanë pranuar tretman mjekësor”, thuhet në njoftimin e Policisë, përcjell albinfo.ch.

Përveç sulmeve fizike, policia shton se gazetarëve u janë dëmtuar edhe pajisjet e punës.

“Pengimi i gazetarëve në kryerje të detyrës, cenimi i shprehjes së lirë, pengimi i pasqyrimit të situatës reale, sulmet e dhuna fizike, si dhe dëmtimi i automjeteve dhe i pajisjeve zyrtare janë veprime kriminale, të cilat do të hetohen nga Policia e Kosovës. Në bashkëpunim dhe koordinim me organet e drejtësisë, janë iniciuar rastet sulm ndaj personave zyrtarë, asgjësim apo dëmtim i pronës dhe lëndim trupor”, ka thënë Policia.

Mes tjerash, policia tregon se është sulmuar edhe automjeti zyrtar që po shoqëronte ministrin Krasniqi.