Dënohen sulmet ndaj gazetarëve në Leposaviq

Shtetet e Bashkuara të Amerikës kanë dënuar sulmet ndaj gazetarëve në Leposaviq këtë të premte.

“Dënojmë sulmet e vazhdueshme ndaj gazetarëve në veri të Kosovës, përfshirë të sotmet. Ritheksojmë thirrjen që mediave duhet t’u mundësohet puna e lirë, pa dhunë e frikë”, ka shkruar Ambasada e SHBA-së në Kosovë, në Twitter, përcjell albinfo.ch.

Kryeministri i Kosovës, Albin Kurti, po ashtu ka reaguar, duke thënë se palët që po janë të zëshme për situatën në veri duhet të reagojnë dhe të dënojnë sulmet ndaj gazetarëve.

Ai ka postuar një video teksa sulmohet kameramani i Radio Televizionit të Kosovës nga huliganët në Leposaviq, duke thënë se sulmet ndaj atyre që raportojnë nga veriu janë të papranueshme.

“Një tjetër gazetar është sulmuar brutalisht teksa mbulonte zhvillimet në veri të Kosovës sot nga persona të maskuar. Sulmet fizike ndaj atyre që raportojnë nga terreni janë absolutisht të papranueshme dhe duhet të dënohen nga të gjitha palët që në anën e kundërt janë të zëshme për situatën”, shkruan Kurti në Twitter, përcjell albinfo.ch.

Policia e Kosovës ka konfirmuar se nëntë gazetarë janë lënduar në Leposaviq.